أخبار وطنية قبل إضرام النار في جسده بلحظات: هذا ما جاء في الكلمات الأخيرة التي قالها الصحفي الراحل عبد الرزاق زرقي وعرّى فيها "الوجع"
أقدم عبد الرزاق زرقي مصور بقناة تلفزية خاصة يعمل بالقصرين على إضرام النار في جسده أمس الاثنين 24 ديسمبر 2018 في ساحة الشهداء بمدينة القصرين ليتوفي بعد ساعات قليلة تأثرا بخطورة الحروق التي طالت كامل جسمه.
وقبل إقدام الصحفي الفقيد على إضرام النار في جسده صوّر فيديو انتقد فيه ما يعيشه الشباب المهمش في ولاية القصرين فضلا عن وضعيته الاجتماعية القاهرة.
وهذا ما جاء في الكلمات الأخيرة التي قالها الصحفي عبد الرزاق زرقي في الفيديو الاخير المباشر الذي صوره قبل موته:
" السلام عليكم صباح الخير الناس الكل مرحبا صباح الخير للبطالة الكل.. تعملو مزية الكلام الي باش تسمعوه توة أعملولو برتاج للناس الكل.. موضوعنا توة الصباح تعرفوه شنية الي أولاد القصرين البطالة نحكي على البطّالة الي ما عندهمش مورد رزق والي ما عندهمش باش ياكلو في كروشهم كيف يجيو يعملو هنا احتجاجات تولينا ارهاب..
انسان يهبط في الشارع باش يطلب حقو في التنمية والتشغيل يطلعولنا ارهاب هاي ضربة في البلاصة الفلانية هاي منعرفش شنية معناها اسكت.. بلّع فمّك اقعد فم ميت بالشر.. نداء للبطّالة القصارنية بالنسبة ليا نا باش نعمل اليوم ثورة وحدي.. والي يحب يجي معايا يساندني مرحبا على خاطر هذيا باش نعمل احتجاجات وحدي باش نشعلها وحدي باش نشعّل روحي معنتها وكان يخدم واحد في جرتي ميسالش ربي يعينو..
يزينا 8 سنين كل يوم هاو باش نخدمو هاو جانفي الاول هاو الثاني هاو الثالث هاو الرابع بكلها كذب وبالنسبة ليا نا راني مننتميش حتى لحزب انتوما تخلّوا البطالة وتخدّموا الناس الي عندها مورد رزق عندها منين تتصرف..
ثمة عباد معندهاش ثمة جهات مهمشة مفقرة الدورو لا بالعربي عباد موتى وعباد حية وهوما موتى في بالكم الي ثما بلايص في القصرين ميعرفوش شمعناها اسم الرئيس ميعرفوش الوالي شكون اسمو ميعرفوشو اكثرشي م الشيخ ميعرفوش اسم الشيخ...
ثما عباد جاري بيها الهم بالله برطاج الناس الكل بالنسبة ليا نا راني باش نبداها لاني باش نستنا لا جانفي لا فيفري لا مارس.. علاش باش نستناه انا جانفي.. مازالت 4 دراج وبالنسبة ليا نا راني باش نشعل روحي بالايسونس.. بالايسونس باش نشعل روحي باهي نا باش نشعل روحي.. خلي الدولة ترا ثمش متتلفت للقصرين..
القصرين راهي عباد موتى بالشر راهي عباد ملقت ما تحط في كروشها طلبنا التشغيل معطوناش.. طلبنا التشغيل عطونا الارهاب كل يوم معزوفة الارهاب هاو ارهاب هاو القصرين ارهاب تي علاش ماناش بشر؟ ماناش عباد في القصرين؟ عباد كيفنا كيفكم وزير يخلص في 30 مليون وواحد قصريني تلقاه يطلب في سيقارو وبـ500 فرنك من عند أمو باش يعمل قهوة..
24 ساعة وهو مطيّش في القهوة اعطونا الخدم توة نخدمو بالنسبة للبطالة من اولاد القصرين نحكي على ولاد القصرين الي يحبو يطلبو التشغيل بالرسمي اولاد القصرين البطالة الكل تجي لساحة الشهداء مازالو 4 دراج وأطلبوا حقكم ... انشاء الله ميساجي وصل.. بالنسبة للايسونس هاو ليسونس (يحمل قارورة من مادة الايسونس) 4 دراج وباش نشعل روحي...
سلام "
